Os Enxebres da Pedra d'Arca

febreiro 17, 2015

Na "Vendima Tarda" de Treixadura soa unha peza tradicional, "Muiñeira da volta da festa", que di:

"O gaiteiro de Soutelo

foi tocar a Redondela,

deixou a gaita no camiño

e agora chora por ela."

Nos camiños da Pontenova quedaron moitos dos sons dos nosos gaiteiros. Como me dicía Cesáreo do Vilar de Conforto, "avisabamos da nosa chegada tocando polo camiño antes de chegar ás festas".

Os da Pedra da Arca fundáronse en forma de cuarteto no ano 1936. Empezaron chamándose "Os da Victoria", seguramente nunha época onde a música empezou a "estar mal vista" o nome debía ser un pouco "condescendente" cas autoridades. Pero o mellor é falar da música.

Xusto co clarinete, Benedicto co Bombo, tres gaitas que pasaron por distintas mans ata rematar en Agustín nos últimos anos e unha caixa que Cesáreo, o fillo de Xusto, desexaba tocar dende neno, constituían a última formación do grupo.

Música tradicional, música de festa e moitas gañas de facer disfrutar fixeron dos da Pedra da Arca un grupo moi demandado para as celebracións das nosas aldeas. Algunha das súas pezas versionáronas os membros do grupo Airiños do Eo xa nos anos 80 do século XX.

A súa estética propia facía que non foran uns músicos ao uso, con faixa e monteira tradicional. Todo esto en nada desmerecía a música que facían e as festas que animaban.